fol. 6r

her coloure eke . so lyvely . and so bright .
her eyen . brend semyng as fuyr clere
passyng ful ferr[e] . above mannes sight .
as þough she were ful clere and clene of myght .
as she had bene ful yongly of corage .
yet semed she to every worldly wight .
þat she was ovre passed mannes age .
¶ her stature was of doutfull juggement .
som tyme þus as cr.e? mannes . meet .
and som tyme was her statue so existent
that wiþ her hedd . she semed heven beet .
And others while her hede so hy she geet .
she persyd heven . and myght no more be seyne .
so þat we must þe sight of hir forlete .
and alle oure lokynge . after . was in veyne .
¶ her clothes wrought were . of thredes . smale .
wiþ sotell craft of nature . p[er]durable .
And wiþ her hondes . by her oune tale .
she had hem wrought . I. holde it no fable .
þe beaute of hir was . ful comendable .
But dusk thei were . forleten . as for elde .
as ymages . in smoke . þat had . stonden . stable .
that be not wessh[?] . ne wyped not selde .
¶ And in þe h[?]eme bynethe . made she had .
So as I coude hit knowe a grekish[?] . P.
and in þe bordurs . alle above . I . rad .
And there also she had made . a . T.
and so bitueen . þe lettres might . I . see .
lyke . a . laddre . what þat ev[er]e it mende
where on . men . myght alwey fro . gre . to . gree .
From . lowe . byneth . ev[er]e upward assende .