Bodleian Library MS Fairfax 16

And thus endureth, til that she was so mate that she ne hath foot, on which she may sustene but for languisshing, eve[r] in this estate of which Arcite, hath nouther routhe ne tene his hert was elles wher, newe and grene that on her wo, ne deyneth him not to thinke him rekketh never, where she flete or synke

His new lady, holdeth him up so narowe up by the bridil, at the staves ende that every worde, he dred hit as an arowe her daunger made him, bothe bowe and bende and as her lust, made him turne or wende for she ne g[ra]unted him, in her lyvynge no grace whi, that he hath lust to singe

But drof him forthe, unneth list her knowe that he was serva[u]nt, unto her ladishippe but lest that he wer proude, she helde him lowe thus serveth he, without fee or shippe she sent him now to londe, now to shippe and for she yafe him dau[n]g[er], al his fille ther for she had him, at her oune wille

Ensample of this, ye thriste wy[m]men alle take her Anelida, and Arcite that for her list him, her der hert calle And was so meke, therfor he loved her lyte the kynde of mannes hert, is to delyte In thing that straunge is, also god me save for what he may not gete, that wolde they have

Now turne we, to Anelida ageyn that pyneth day be day, in langwisshinge but when she sawe, that her ne gat no geyn upon aday, ful sorowfully wepinge she cast her for to make, a compleynyng and with her oune honde, she gan hit write and sent to her theban knyght, arcite.

So thirled with the poynt &c[era]