f 12v

That was quod Trouthe for he was reche reccles
Too goo the way th[a]t I thoughte hym of reson
Quod Mercy than the mortal foo of pees
The olde serpent / roote of alle treson
Of fals envy and indignacion
lay in wayte to brynge hym in a trayne
When f unto hym he falsly dyd fayne

That /yf/ he yete of / the forboden tre
The feyre froyte in paradise p[re]sent /
he shulde like unto goddis bee
Of / good and evylle to have entendemente
And for my syster Trouthe was absente
And ye youreself / also Ryghtwisnesse
he was betrayed sleyly be falsenesse

Wherfor quod Mercy I purpose utterly
hym to releve yf / I canne or maye
And I quod Pees wille helpe feithfully
The grete yre and rancour to alaye
Of jugement / to put / hit/ in delay
And here uppon to fynde ful refuge
I wille procede afore the hye Iuge /

And right / w[i]t[h]/ tofore [th]e kyng/ of / glorie
Mercy and pees this cause brought / anon
And in the hye hevynly consistorie
Pes seyde thus amonges hem everychone
O blisfulle lorde [th]at /art/ bothe thre and one
So please it/ the benyngly to here
What/ I wille seyn and my suster dere