64r

[Column 1]
Lolifans quant il le requiert
Car desous le ventre le fiert
Dou pie trenchant com alemele
Si forment que tout lesboele
Ceste beste est de tell vigor
Quele ne doute vencor
Cil qui la voelent en lacier
[Il?] avont prmes por espier
Qant elest endeduit alee
Ou en monteingne ou en valee
Qant il ont trovei son repaire
Et bien avisei son afaire
Si vont por une demoisele
Qui sevent bien qui est pucele
Puis la font seoir et atendre
Aurecet por la beste prendre
Qant lunicorne est revenue
Et la pucele veue
Droit ali vient tout maintenant
Si se someille enson devant
Et la demoisele la prent
Come cele qali se rent
A la pucele joue tant
Qendormis est en son devant
A tant saillent cil qui lesprent
Iluec le prennet si locient
Puis la mainent et devant le roi
Trestout aforce et a desroi
I ceste est merveilleuse beste
Qui une corne a en la teste
Senefie nostre segnor
I hesucrist nostre saivieor
Cest lunicorne esperitel
Qui la virge prist ostel

[Colum 2]
Qui tant est de grant dignitet
Encesti prist humanitei
Parcoi au monde saparut
Ses pueples mie ne le crut
Des gieus ⋅ ancois lespiierent
Et puis leprirent et lijerent
Devant pylate le menerent
Et iluec a mort le dampnerent
Cele corne tant seulement
Qui la beste a tout vraiement
Senefie lumanitei
Si com diex dist par veritei
En levangile aperte et cleire
Nous sommes com vi ⋅ et lipeire
Et li bons prestres zacharie
Ains que diex nasquist de marie
Dist que en la maison davi
Son bon enfant et son ami
Lametra Ihesu criste son cors
Et diex meismes dist encors
Par david qui le crie et corne
Si com li cors de lunicorne
Sera li miens cors essaucies
Si com diex la convienancie
Fu ceste parole a complie
Et li dist en la prophecie
Qant Ihesu criste fu coroneiz
Et en la vraie crois poseiz
La grant angoisse senefie
Donc ceste veste est reamplie
Ce que on ne porroit savoir
Les poesteiz dou ciel por voir
Trone ne domination
Lueure de lincarnation

[Initial, col.1, line 29, /I/, 1 lines, in red.]

[Marginalia: on the top right margin a roman numeral is added in black ink, lxv, probably indicating an older pagination. Charta number is added on the top right margin in arabic numerals in red ink, 64]