67v

[Column 1]
De moustrer essamples non fables
Bones vraies et delitables
Li livres nest mie doiseuses
Essamples ia deliteuses
Ou il a moult riche matere
Dont nous faisons la letre clere
En desers daufrique la grant
Trueve len qui les vait querant
Ices asnes dont je vous cont
Si na si grans en tout le mont
Et si ne sont mie iceus
En desers ne en bois rameus
En valees et en montaignes
Sont li haraz a granz compaignes
En chascun haraz finement
Na fors i malle seulement
Et cil les femeles maistroie
Et en la plame et en larbroie
En haraz na qun estalon
Et qant la femele a foon
Se femele est femele soit
Mais se li peres aparcoit
Qil soit malles ne targe gaires
Quilli colpe les genetaires
A ses dens car il ne vieut mie
Je cuit que ce soit jalousie
Qui lart ses membres tant creuz
Que les haraz saillir peust
Qant li mois de marz est entreiz
Et xxv jor sont passei
Dont rechene lasnes sauvage
Ou en plaines ou en boschage
Le jor rechene xii foiz
Et la nuit xii ce sachoiz

[Column 2]
Dont sevent bien li paisant
Qui pres dilueques sont menant
Qualors sont les nuis et li jour
Dun estat et dune longour
Por le jor que xii foiz crie
Des la jornant jusqa complie
Xii fois la nuit ensement
Quenoissent il tout vraiement
Iceste beste par droiture
Porte dou maufei la figure
Job raconte que navient mie
Qasnes sauvages braie et crie
Nule fois se fains ne lasproie
Autresi cil qui nous guerroie
Nostre anemis nostre aversaire
Qui ne fine de nous malfaire
Por cui sains peres nous chastie
Que nous ne nous endormons mie
Mais que nous veillons et ouron
Car tous jors nous vait environ
Comme lions por devorer
Se sans garde nous puet trover
Qant il voit le pueple venir
A la loi dieu et convertir
Qui estoit enlombre de mort
Et entenebres sanz confort
Dont ot duel etsi rechena
Et encor plus rechenera
Qant il verra toute la gent
Venir adieu communement
Qant il verra les arrabis
Et les paiens et les juis
A la loi dieu trestous torner
Dont porra braire et rechener

[Initial, col. 2, line 9, capital I, red.]