57r

[column 1]
Noz enfermeteix visita
Noz pechiez enson cors porta
I saut fist jusqenla crois vraie
Dont li diables molt sesmaie
Ensi faire le convenoit
Ensi com moises avoit
Chacie le serpent dou desert
Ausi convenoit en aperert
Lefil de fame estre chacie
Et enla sainte crois haucie.
La nature dou pellican
Dou pellican vous devons dire
Ou molt a raison et matire
Norreiz plus bele mais owan
Damediex dist dou pellican
Par la bouche le bon david
Qui de grace fu raemplis
Quil estoit faiz alui sambables
Pellicans est oiseaus mirables
Si habite en la region
Dou flueve qui nilus a non
En rivage de nil habite
Et ce nous dist lestoire escrite
Quil enia de ·ii· menieres
Cil qui habitent en rivieres
Ne menivent se poissons non
Cil qui ne·menjuent poisson
Habitent en la desertine

[image: An illumination showing Christ on the cross, with the Virgin and Longinus to Christ's right, and John and a Roman soldier to his left. At the left is a depiction of a pelican in a font, feeding its young from its breast as an allegorical type for Christ's sacrifice. Another bird below the font grasps a fish in its beak. The scene is set against a pink background, enframed in blue.]

[image: Initial /D/, 2 lines, in blue with red pen flourishing extending down the left margin]

[column 2]
Sine menjuent fors vermine
Dou pellican est grans merveille
Ca onques nule jolne oiseille
Nama tant son petit aignel
Com il fait son petit oisel
Qant ses poucines aesclos
En eaus norrir et char et os
Met toute sa paine et sacure
Mais molt fait male norreture
Car quant il sont creu et grant
Et auques sage et bien poissant
Si bechent lor pere ens ou pis
Et tant li sont fel et eschis
Que li peres de fin corrous
Les ocist et tue trestous
Au tiers jor vient li pere aeus
Si les commuet pitiez et deus
Tant les aime damor parfite
Que lors revient si les visite
Deson bec perce son costei
Tant quil en a dou sanc ostei
De ce sanc qui de lui ist fors
Lor ramaine il la vie en cors
A ces poucins nen doutez mie
Et en tel sens les vivifie
Segnor or oiez que ce monte
Ja entenderiez vous ·i· conte
Dartu ou de charle ou dogier
Ci a aboivre et a mengier
A larme de chascun foial
Qui de dieu vieut avoir consal
Dex si est li vraiz pellicans
Qui por nous traist poine et ahans
Oiez que dist la prophecie

[Image: initial /S/, 2 lines, in blue with red pen flourishing extending down the left margin; a guide letter is visible beneath the red flourishing]