f. 038v - 039

Savoir dastronomie adret
Tant fust sages ne posteis
Ne tant peust estre soutis
Le machon ou charpentier
Ne lestrument de son mestier
De quoi il fourme sa matiere
Tout ainsi par drete matiere
Sont li autre .vi. estrument
Dastronomie et fondement
Et pour leur sen et leur maniere
Li preudoume cha en arriere
Et roi et prince et grant seigneur
Leur tolent trestuit leur labour
Et savoir les ars de clergie
Pour mieus entendre astronomie
Tant quil en avoient leur part
Car il savoient par leur art
Selonc la volente devine
Sen savoient mainte covine
Qui avenoient par le monde

Si ne prisoient nes une onde
Qui par leve vont jus saillant
Et sus la terre vont tunbant
Concil qui les resons savoient
Des choses si coume avenoient
Si estoit coustume a ce tens
Que nus sers hons a autres gens
Ne nus bas honne nul vilain
Tant fust de grant richece plain
Nosoit de .vii. ars riens aprendre
Pour li gentil qui tuit entendre
I vouloient li principal
Que frans fussent et liberal
Si leur nuisent par tel reson
Set ars qui liberal ont non
Et adroit. que si franches sont
Que lame toute franches font
Si les ont si adroit ordenes
Et si entierement dounees
Quen ni puet riens oster ne metre