f. 042v - 043

Biax enfes allez let devient
Et le let souvent devient biax
Li un amout de ses avi aviaus
Et li autres en a petit
Si con chascun en son escrit
Un petit hons .i. grant engendre
Et li bien^/.souvent^/.grant .i. mendre
Un petit home emprent tel chose
Que .i. grant mie emprendre nose
Li un meurt tost et lautre tart
Tant que par aage sen part
De ce siecle selonc nature
Par la volente dieu li dure
Si voit on bien souvent en gent
Que li un a clergie entent
Et li autre a autre mestier
A fevre ou a charpentier
Ou la ou il met son sens
Chascun si doune selonc le tens
Ne a autre ne se veut metre

Donc il se seust entremetre
Si bien coume de celui fet
Ou sa nature se retret
Si est uns autres dautre afere
Qui mout bien sen set bien a chief trere
De pluseurs choses asovir
Cuns autres ne pourroit fonir
Car sa nature ne dit pas
Lun bee haut et lautre bas
Si voit on que sovent avient
Que la ou li hons bee avient
Et autre foiz nen vien a chief
Ainz li torne tout a meschief
Si qua paine puet asoumer
Riens qui ne voeille a fin mener
Une autre reprent autre afere
Dont il se set mienz a chief trere
Un air si est desus cest air
Qui en latin a non archair
Cest a dire pur air ades