Egerton 1993 St. Austyn

SEint Austin þat cristendom · brouȝte to engelonde Riȝt is among oþere · þa^t we him vnderstonde Seint Gregori þeholi mon · þa^t [pope] was at rome Engelonde he louede muche · þeiȝ he neuer þer ne come. Me tolde him þat þe lond was god · ac þat it heþene was Sori was seint Gregori · þat hit cristned nas. Him self he wolde habbe iwend · here to engelonde. Ache ne moste for cardinales · ac sende scholde asonde Wiþ anvourti gode men · seint austin he nom And sende her to engelond · to prechi cristendom. And alle were monkes · seint austin and þe oþere Þese holi men wenden forþ · hi werre alle as broþere. After þat god was ibore · vif hondred ȝere it was And vour score and toȝer · þat hi duden þis cas. Hi draden sore vor hine couþe · no speche of engelonde Hi nomen men þat couþen boþe · þe langag[es] vnderstonde. And dudenhemvorþ inþesee · þo hi þiter com[e] Toward þehaþene of engelonde · þe riȝte w[ei hi n]ome. To an yle bi este kent · herre schip gan euerie [wende] Þat tinbiȝt is icleped · as ourre lord hem gan s[ende]. Þer heo token her in · and nomen hem to rede How heo miȝten best ontake · toþis holi dede. ¶ Þe king ailbriȝt þa^t was þo · king of engelo[nde] Bi a queinte messager · vairre hisenden herre sonde. Þat hi weren messagers · viii an her mon icome To don is message · vrom þe court of rome. Þat scholde beo helpliche wiþouten ende · to [hi and to his londe] To gret prow ⁊ richesse · ȝif hiwolden vnderst[onde]. ¶ To þis word to þe king com · he stod awhile [in þouȝt] Gode tidinges mote it beo · þa^t hi me habbe [brouȝt]. Vnder fong hem faire · ⁊ hon^oreþ hem also And findeþ hem plente · of þat hi habbeþ [nede to.] Vorte ichabbe wiþ hem speke · ⁊ here message [se] God leue ashi me bihoteþ · þa^t it mote mi [prow be.] His heste was wel iholde · me fond hem [inow.] Þe king toward þat yle · sone þer after drow. Þo he to þe yle com · toseint Austin he s[ende] Þat he to don is message · sone to him w[ende.]

Seint austin him greiþede · ⁊is felaws echon Vorte viȝte aȝen þe deuel · ⁊ to bataile gon. Hi maden þe þe signe of þe crois · oþer armurre nedden heo non Vorte do þis bataile · ⁊to ouer comen herre fon. Acrois of seluer wiþ þe forme · of god hi lete arere And in stude of banere · bifore hem alle hi bere. Hiȝeodenfoþ baldeliche · as bolde kniȝtes and gode And siwede þat swete baner · wiþ þe forme of þe rode. Higon singe þe letanie · vor prow of þe londe ¶ Þe king hi gretten vairre · þo hi to him come And seide þe ernde þat hi brouȝten · vrom þe court of rome. Hi pr^echeden him of cristendom · ⁊ of ourre lordes lawe To goder hele him ⁊ hise · wolden hi þer to drawe. Heo biheten him heuene · þa^t so riche was and is Þa^t he scholde after þat lif · torne to þat blis. And heo þer wiþ outen ende · wiþ god þa^t vs bouȝte Þe king stod þo he herde þis · inawel gret þouȝte. Vair þing hit is he seide · þat ȝe me bihoteþ me Were ich siker þat hit were soþ · don icholde after þe. Ac me asente not þer to · vor hit is ȝet newe Ar ichabbe more vnderȝete · ȝif þis beotrewe. Ac vor ȝe beþ sotrauailed · vrom so ferre londe And vor mi gode as ȝe me doþ · to vnder stonde. Greue ich nelle ȝow nouȝt · ac vairre biȝow do Vor vinden ichulle ȝow · alþat ȝe habbeþ nedeto. And ich gr^ante alle þilke · þa^t wolleþ to ȝow terne God leue ich ȝeue vch man · inel nomon werne. Þis was ate furste · agod bigynnynge Þerafter was þe betre hope · to come to god endinge. Seint Austin ⁊ alle hise · aswiþe fair woninge Þe king ȝaf in douerre · to do þer herre prechinge. Seint Austin ⁊ hise felaws · bigonne to preche vaste Soþa^t somme þat gode were · to hem here herte caste. And turnde to cristendom · euer þe leng þe mo Þat volk abouten hem com · as þikke as hi miȝten go. Heore dede sprong so wide · þa^t to þe king it com Þe miracles þat hiduden · as heo precheden cr[iste]ndom. Þe king herde hem preche · him þouȝte hit was god Tolonge he seide ichabbe abide · ar ich þis vnerstod. He tornde to cristendom · ⁊ let him baptize anon And leuede on ihesu crist · ⁊ hise men echon. Þus þese holi men hedden · herre wille ate nende And þe volk of ech toun · to cristendom gan wende. ¶Þa^t ourre lord hem sende grace · herre preching to vnderstonde.

Seint Austin wende aȝe · þe pope he tolde at rome How þe volk of engelond · cristendom nome. Þo was þe pope Gregori · ibrouȝt ingrete blisse Seint austin he sende aȝen · þe lond bet to wisse. Seint Austin wende aȝe · ⁊ þo he þider com Twelf bischopes he made · to warde wel cristendom. Þe þretteþe he was him self · as ourre lord ȝaf cas Erchebischop at douere · þe furste þa^t euer was. Seint austin brouȝte cristendom · þer to engelonde Wel auȝte we is day holde · whose were vnderstonde. His day is þe ende of may · vorþat day he wende Out of þis lif to ihesu crist · þa^t after him þo sende. Þe king ailbert deiȝede þo · six hondred ȝer riȝt And seuentene aft ourre lord · was anerþe aliȝt. And on an twenti ȝer ek · after is cristendom And inþe sixe and fiftiþe ȝer · of is kinedom. Bidde we ȝerne seint austin · þa^t to cristendom vs brouȝte Þat we to þe ioie come · to whoch ourre lord vs bouȝte