5

{Dunstanus}
¶ Þer aftir sone to Glastingeburie · seint Dunston aȝen wende ·
Abbod he was þer ymad · is lif vor to amende ·
And vor he nolde by is wille · no time ydel be ·
An priueye simiþþe by is celle · he let him by se ·
¶ Vor wan he moste of is orisouns · reste vor werinesse ·
To querke he wolde is hondin do · to fle ydelnesse ·
Serui he wolde pouremen · þe wyle he miȝte dure ·
Al day vor þe loue of god · he ne keþte of ȝem none hure ·
¶ So þat alle at one time he was in þre stedis ·
His hondin atte worke · is hert at god · is mouþ · to bidde is bedis ·
Þer vore þe deuil hadde to him · gret envie · ⁊ onde ·
Atime he com to is smiþþe · al one him to fonde ·
¶ Riȝt as þe sunne ȝeode adoun · as he awomman were ·
And spak wiþ him of is work · wiþ hȝ inde chere ·
And sede wiþ him of is work · gret work to done ·
Ȝeo truflinde is mote here ⁊ þere · in anoþir tale wel sone ·
¶ Gret wondir hadde þis holi man · þa^t ȝeo was here ⁊ þere ·
He sat longe ⁊ byþoȝte him wel · longe wo is were ·
Þo he byþoȝte wo it was · he droȝ him mere is tonge ·
⁊ leyde hire in þe hote fur · ⁊ spak vaire wel longe ·
¶ Vort þe tonge was al afur · ⁊ suþþe stille ynoȝ ·
Þen deuil he hente byþe nose · ⁊ wel vaste droȝ ·
He twengde ⁊ sschot him by þe nose · þat þet fur out blaste ·
Þe deuel wrickid here ⁊ þere ⁊ he held euere vaste ·
¶ He ȝal ⁊ hupte ⁊ drow aȝen ⁊ made grisliche bere ·
And nolde vor alle is byȝete · þa^t he hadde ycome þere ·
Wiþ is tonge he snutte is nose · ⁊ sschok him euere sore ·
Vort it was wiþ inne niȝt · þat he ne miȝte yse namore ·
He flei ⁊ gradde by þe lifte · þat me hurde into al þa^t londe ·
Out wat haþ þis calwe ydo · wat haþ þis calwe ydo ·
In þe contrei me hurde wide · hou þe shewe gradde so ·
¶ At þe sschrewe hadde ybe as god · habbe ysnutte atorn is nose ·
He ne hedde na more þudirward · to tulie him of þe pose ·
Þis holi abbod seint Dunston · hadde wel gret power ·
Wiþ kinge Edmunde þa^t was þo · ⁊ was alle is conseiler ·
¶ Aftir kinge Edmundes deþe · agodwule þere was agon ·
Þat Edwyne is sone was kinge ymad · ⁊ noȝt aftirward anon ·
Þes Edwine hadde vuel red · ⁊ þer aftir he droȝ ·
Wiþ Seint Dunston he was wroþ · certis wiþ gret woȝ ·