f. 165r

l'eull au voutrer desus dit, la raison juge que ce damage deit estre sur celuy
de cui estoit la beste et non mie sur le chief seignor, par dreit. En toutes celes manieres que ma beste meurt ou se mahaigne par ma coulpe ou par la coulpe de ma mehnée, si est le damage sur mei, si que ne m'en doit li rois point rendre de restor par dreit ne par l'asise. Et por ce est tenus li mareschaus de porveyr le paiement des restors as bestes por sauver le dreit dou roi et de ces homes liges par dreit et sans tort l'un à l'autre.

Ici orrés la raison et le poer dou counestable dou reaume et de se qui apartient à son office, por le leuc quil tient de la counestablie dou reaume.

Bien sachés que li counestables est tenus d'oyr et d'entendre les clains et les tors que l'un chevaler fait à l'autre, se li rois nel veut oyr et n'est en la terre. Et par devant le counestable deivent estre jugiés et chastiés les mausfais as cheva lers, par dreit. Encement, si tost com li rois chevauche dehors en ost, bien sachés que la raison coumande que au counestable ataint de faire juger et amender tous les mausfais